Mat 28 | WSK | STEP | Sabbath tom menaram se ubou tumongola worem basuwaram mu Magdala imet Maria se Maria bo tala nuna ali motam aringimonko taiman.

Matthew 28

Jesus barasam

(Mark 16:1-10; Luke 24:1-10; John 20:1-18)

1 Sabbath tom menaram se ubou tumongola worem basuwaram mu Magdala imet Maria se Maria bo tala nuna ali motam aringimonko taiman. 2 Se tom umutang te wanara biya kaparam se Kari Biya ko engel bo duruk te wore tai kaparam, ale manga biya ali motam kuring te baguman mu gurugu due ko beteram, ale awete daigam. 3 Noko koma motam mu pure biliwilik maso ale nikinang kaposo wore iwita. Se ko guang mu siraram nunguningkiri. 4 Se kari ali motam bitarungaman mu ninguru nguangaman, ale nungumik barawara makasan, ale kari kuesan iwita dagu kueman.

5 Se engel nu imet mu nunga maonam, “Nina me nguangaralko,” mam. “Ani ikisam mu nina Jesus tam kangono te tagiman wore ko loagawasan. 6 Bare nu ewela me bagoso. Nu kota balam butata nu maingkala barasam. Iweya, ewela tairal ale kuwim te aniwaram mu arigalko. 7 Asele tairatela namaral ale ko olekem alo iwita nunga maonalko, nu maingkala barasam ale aitak mu giram Galilee namawoso, se nuna Galilee namomon ale aringimonko. Ani den ninga manikko mu es ta ninga manem.”

8 Se imet ilagala mu tairate ali motam beteman, ale nguanga se, wore aking amilmil karogo naguman olekem alo nunga manarmonko namakasan. 9 Ale namangaman se Jesus nongoma te aratam, ale balam, “Tumongola yawara, nengemang lila anirukko,” mam. Se nuna kote namaman ale suwik duap ningi dagulaman, ale iluman nup patawukasan. 10 Se Jesus nunga maonam, “Me nguangaralko. Namaral ale aninga launuria alo nunga maonal se Galilee namomon ale mu te asele ani agarkomonko.”

Priest se supuling bibiya nunga kawel

11 Se imet mu namangaman se kari ali motam bitarungaman mu nunga sang peleman wonong biya ningi kasu naguman, ale mel singir la aratam mu ko duap priest bibiya alo nunga manorman. 12 Se priest bibiya mu kari bibiya arungu biguwuman ale aguwaya betemonko mu ko den nungurman. Ale manga biyala kari ali motam bitarungaman mu nungarman, 13 ale nungaru se nunga manorman, “Namaral mu iwita balalko, ‘Noko olekem alo turom ana aniwaman se taiman ale ko kumik guang tere giman,’ malko. 14 Se den imi Rome kari supuling mu dogowa nagurok se ikiok, mu ana ilak munakanak se nina ikup bo ningimik te me aratukko.”

15 Se bitua kari alo manga mu taman ale namaman priest alo balman butata balu gilingiman. Se tom mu te den imi mu Juda alo nunga ningi geraga saparam, ale eng tai aitak am te balu lagasan.

Jesus olekem 11 nongote aratam ale ura nungaram

(Mark 16:14-18; Luke 24:36-49; John 20:19-23)

16 Se olekem 11 nuna Galilee duruk gotek bo Jesus te namomonko nunga maonam wore te namaman. 17 Ale nu ari gilingiman mu ko nup patawukasan. Bare sang alo nongomang ningi me nunguning akaso.

18 Se Jesus nongote pingi namaram ale balam, “Kaem ani mel suen biya duruk te se ali imi te ta, mu ani ko supuling aga beteram. 19 Buta se, nina sor suen biya te namaral ale den gilalong yawara balal se kariimet aninga olekem ko aratomonko. Ale Nuet nup te, Namar nup te, se Korang Bur nup te nunga anuwalko. Ale den singir la ani ninga manem mu nunga maonal se karo tumonko. Ikialko. Ani pempem la nengerak bagirik nama tom nukum tai aratukko,” ma balam. ^{▼▼Mat 28:20 Kari Biya Jesus pempem ko kariimet arungu bagurukko: Deut 31:6.}

20